Loksins

Loksins.  Það er búið að bíða lengi eftir því að þessi gögn kæmu fram í dagsljósið. Og loksins koma einhver viðbrögð frá ráðamönnum en Sigmundur Davíð var á Bylgjunni í morgun og lofaði því að þetta yrði skoðað.

Málið snýst um tvennt að mínu viti; annars vegar um hvort að velferðarstjórninni hafi verið heimilt að víkja með jafn afgerandi frá úrskurðum FME frá í október 2008 og hún gerði með því að endursemja við kröfuhafa árið 2009.  Í upphaflegu úrskurðum FME er kveðið á hvernig eignir og skuldir skulu fluttar á milli bankana og niðurstaða Sigurðar G. á Bylgjunni í morgun (eins og ég skildi hann) var sú að það hafi ekki verið heimilt að víkja frá úrskurðum FME með þeim hætti sem það var gert.

Hins vegar þá finnst mér málið snúast um það hvor að heimilt sé að innheimta yfirfærðar skuldir á öðru verði en þær eru skráðar í stofnefnahagsreikningi nýju bankana. Reyndir bankamenn hafa sagt mér að það sé ekki heimilt en ég veit það ekki sjálfur fyrir víst.

Ef að það er hins vegar niðurstaðan að þarna hafi verið farið á svig við lög þá er eins áríðandi og að sólin haldi áfram að koma upp á morgnanna að farið verið á eftir þeim ráðamönnum, embættismönnum og bankamönnum sem tóku þátt í þessu. Það er eina leiðin til þess að aga kerfið til þess að láta af þeim ósið að gefa sífellt afslátt af góðum vinnubrögðum.

Menn geta svo spurt sig að því hvaða kraftar drifu verkið hjá velferðarstjórninni við að velja þessa leið. Ég hef svo sem áður minnst á það á þessari síðu að ég tel að ESB umsóknin hafi verið ráðandi í því hvernig bankakerfið var uppbyggt.  Geir H. Haarde hefur sagt frá því í tvígang að Manuel Barroso hafi hringt í hann haustið 2008 og farið fram á "góðan vind" með kröfuhöfum íslensku bankana.  Þá kom það skýrt fram hjá Lilju Móses og Atla Gísla þegar þau yfirgáfu skipið að það hefði verið ljóst af hálfu ESB að sambandið tæki ekki við umsókninni frá Íslandi nema að íslenska ríkið tryggði að Icesave yrði gert upp. Og það verður seint sagt að velferðarstjórnin hafi haldið aftur af sér við að verða við þessum óskum/kröfum.  Öll uppbygging nýja Landsbankans endurspeglar þá þörf sem velferðarstjórnin taldi sig hafa að þurfa að búa til eignir til þess að koma inn í þrotabú gamla Landsbankans. Og í framhaldi af þessu hlýtur maður að spyrja sig að því hvort að óuppgert Icesave hafi í raun verið ástæðan fyri því að vinna við ESB umsóknina stöðvaðist árið 2011.  

Ég veit að ég hljóma eins og ég sé orðinn vitstola af bjartsýni en það sem ég gæti óskað mér að myndi gerast núna í framhaldi af þessu er að fólk sem styður vinstri flokkana hætti í eitt skipti fyrir öll að sá í akur óvina okkar með því að reyna að tala niður úrbætur í skuldamálum heimila og fyrirtækja. Það er einfaldlega stórhættulegt fyrir efnahagskerfi þjóðarinnar ef ekki tekst að koma í veg fyrir það að kröfuhafar nái að breyta krónueignum sínum í erlendan gjaldeyri. Þessar nýju upplýsingar geta hjálpað okkur við að vinda ofan af þessum vanda sem við erum í.   

Stórfelld svik og blekkingar

Athugasemdir

[Ómar Geirsson, 23.1.2015 kl. 13:31]

Já Benedikt.

Já, já.

Ég veit að ég hljóma eins og ég sé orðinn vitstola af bjartsýni en það sem ég gæti óskað mér að myndi gerast núna í framhaldi af þessu er að fólk sem styður vinstri flokkana hætti í eitt skipti fyrir öll að sá í akur óvina okkar með því að reyna að tala niður úrbætur í skuldamálum heimila og fyrirtækja. Það er einfaldlega stórhættulegt fyrir efnahagskerfi þjóðarinnar ef ekki tekst að koma í veg fyrir það að kröfuhafar nái að breyta krónueignum sínum í erlendan gjaldeyri. Þessar nýju upplýsingar geta hjálpað okkur við að vinda ofan af þessum vanda sem við erum í.   

Segi bara ef menn á annað borð þjást ekki af valkvíða, og vilja verða vitstola af bjartsýni, þá er allavega gott að menn verði ekki vitstola af öðru tilefni.

En þetta eru akuryrkjumenn.

Segi bara ekki annað.

Kveðja að austan.

[Benedikt Helgason, 23.1.2015 kl. 13:40]

Þú hittir naglann á höfuðið Ómar; "Akuryrkjumenn" er orðið.  Og það er auðvítað dálítið tragíókómískt að hann var einmitt landbúnaðarráðherra sá sem sáði hvað ákafast.